Hoş ol zaman ki harîm-i visâle mahrem idim

Hoş ol zaman ki harîm-i visâle mahrem idim
Ne mübtelâ-yi belâ ne mukayyed-i gam idim

Gezerdim itlerin içre fezâ-yi kûyunda
Yerim behişt-i berîn idi ben bir âdem idim

Hemîşe secde-gehim hâk-i âsitânın idi
Bu i'tibâr ile bir ser-bülend-i âlem idim

Gedâ-yı kûyun idim böyle zilletim yok idi
Serîr-i saltanat-i kurbde mu'azzam idim

Zaman zaman eser-i pertev-i cemâlinden
Mu'âlic-i dil-i pür-derd ü çeşm-i pür nem idim

Ziyâde gam-zedeyim hecr ile hoş ol günler
Ki ben bu gam-zedelikden ziyâde hurrem idim

Fuzûlî olmaz imiş mihnet-i firâka müfîd
Bu zevk zikri ki bir vakt yâre hem-dem idim